Տարածել:
Սա սիրո և նվիրվածության պատմություն է, որը կգրավի երեխաներին յուրօրինակ նկարազարդումներով ու ջերմ զրույցներով։ Գրքի հեղինակը լատվիացի մանկագիր և թարգմանիչ Սիգնե Վիշկան է։
Լատվիացի մանկագիր Սիգնե Վիշկայի դեբյուտային «Կատեն ուզում էր պապիկ դառնալ» պատկերագիրքը գեղեցիկ պատմություն է սերունդների միջև ամուր կապ ստեղծելու և պահպանելու մասին։ Էլինա Բրասլինյայի նկարազարդմամբ գիրքը ներկայացնում է փոքրիկ Կատեի և նրա սիրելի պապիկի միջև հատուկ կապը, որը այնքան խորն է, որ աղջիկը ցանկանում է նմանվել իր պապիկին։
Վիշկայի պատկերագիրքը խորությամբ նկարագրում է երեխայի աշխարհը, որտեղ կարևորագույն կերպարներից մեկը պապիկն է՝ իր հանգիստ բնավորությամբ, մեծ ու ապահով ձեռքերով, գրպանի՝ անսպառ կիտրոնե կոնֆետներով ու մեղմ սպիտակ մազերով։ Կատեն ցանկանում է պապիկի պես լինել բարի, հոգատար, համբերատար։ Գիրքը պարզ, սակայն խորամանկ ուղերձ է փոխանցում այն մասին, թե ինչպես են մեծահասակները դառնում երեխաների համար լավագույն օրինակ։
Գիտականորեն ապացուցված է՝ տատիկ-պապիկների և թոռների միջև կապը կարևոր նշանակություն ունի երեխաների զարգացման համար. նրանք ունեն ավելի բարձր զգայական ինտելեկտ, բարձր ինքնագնահատական և սթրեսակայուն են։
Կատեի պատմությունը նաև անդրադառնում է մշակութային արժեքների փոխանցման կարևորությանը։ Պապիկները պահում են ընտանիքի պատմությունը, ավանդույթները, կենսափորձը։ Երբ երեխան ցանկանում է նմանվել պապիկին, նա իրականում ցանկանում է ժառանգել այդ արժեքները։
«Կատեն ուզում էր պապիկ դառնալ» գիրքը ցույց է տալիս, որ երեխաները կարող են սովորել ոչ միայն բառերից, այլև օրինակից, սիրուց, համբերությունից։
Պատկերագիրքը լատվիերենից թարգմանել է Նաիրա Խաչատրյանը։ Շնորհանդեսը տեղի կունենա հունիսի 22-ին՝ Newmag Summerfest-ի 2-րդ օրը՝ 18:00, Երազ այգում։ Մուտքն ազատ է, այդ օրը գիրքը կարող եք գնել զեղչով։
Այլ հոդվածներ
Ինչպես առանց արցունքների ու դրամատիկ տեսարանների սահմանել «Կարգապահություն՝ առանց դրամայի» (տեսանյութ)
2023-08-07 10:43:44
«Մանկական գրքի փառատոնին» «Երազը» ներկայացրեց «Կարգապահություն առանց դրամայի» ձեռնարկը (լուսանկարներ)
2023-07-31 11:01:57
«Վտվտիկի օրագիրը» գրքի հերոսների մասնակցությամբ սերիալ, մուլտֆիլմ, դեմքերով նոթատետր, փազլ ու էմոջի (տեսանյութ)
2023-09-19 05:36:56
Տեղի ունեցավ «Կարգապահություն՝ առանց դրամայի» բեսթսելլերի շնորհանդեսը (լուսանկարներ)
2023-07-31 10:48:27