Ռուսլան Սաղաբալյանը (ծնվ. 1951 թ.) արձակագիր, դրամատուրգ և լրագրող է։ Նրա բազմաժանր ստեղծագործական ժառանգությունը ներառում է գիտաֆանտաստիկ գրականություն, դրամատուրգիա, ֆիլմերի, մուլտֆիլմերի և վավերագրական ֆիլմերի սցենարական աշխատանք։ Ավարտել է ԵՊՀ ռուս բանասիրության ֆակուլտետը և ԽՍՀՄ Պետկինոյի սցենարիստների և ռեժիսորների բարձրագույն դասընթացները։ Եղել է «Լիտերատուրնայա Արմենիա» ամսագրի հրապարակախոսության և արվեստի բաժնի վարիչը, «Առագաստ» թերթի ռուսական հավելվածի և Մոսկվայում որոշ պարբերականների գլխավոր խմբագիրը։ Արժանացել է Կիևի միջազգային կինոփառատոնի «Գրան պրի» մրցանակին, Մոսկվայի Գրողների միության մեդալին և Մեդիա-միության միջազգային «Ոսկե բառ» մրցանակին։ Հայաստանի և Մոսկվայի Գրողների միության անդամ է, ավելի քան 2000 հրապարակումների հեղինակ։ Ռուսլան Սաղաբալյանի ստեղծագործությունները թարգմանվել են 15 լեզուներով։